كل الأنظار كانت على كول بالمر.. أبدع، تألق، سجل، وخطف جائزة رجل المباراة.
لكن الحقيقة؟ في بطل تاني كان بيقاتل في صمت وسط المعركة..
مويسيس كايسيدو
باريس سان جيرمان كان بيتفوق على الكل تقريبًا في الشامبيونزليج وكأس العالم للأندية بفضل خط وسطه الناري: نيفيز وفيتينيا.
لكن قدّام كايسيدو؟
الثنائية دي اتفككت تمامًا.
كايسيدو وقف زي السد.. افتكاك، تغطية، قراءة مدهشة للمساحات، تدخلات على أعلى مستوى، ودايمًا واقف في المكان الصح.
كل محاولة اختراق من العمق؟ اتبلعت.
كل محاولة استلام بين الخطوط؟ اتخنقت.
كل ضغط على كايسيدو؟ اتكسر.
شراكته مع إنزو فرنانديز كانت مثالية، ووجوده جمب ريس جيمس عمل ثلاثية رهيبة بتخليه يطلع الوحش اللي جواه بدنياً وتقنياً.
أنا فاكر كويس كمية النقد اللي نزلت على كايسيدو أول الموسم، كمية تشفّي وسخرية بسبب المبلغ اللي دفعه تشيلسي فيه..
بس اللي شاف كايسيدو برايتون، كان عارف إن الدبابة دي هتفور في وش الكل عاجلاً أو آجلاً.
كايسيدو مش بس بيرد على منتقديه.. ده بيكتم أنفاسهم!
بيستلم تحت الضغط؟ ولا كأن في حد بيجري وراه
واقف تحت الكورة؟ قافل كل ممرات التمرير
بيفكر قبل ما الكورة توصله، وبيتحرك بذكاء من غير كورة
فيتينيا؟ مشوفنهوش طول الماتش!
رويس؟ اتكتم تمامًا!
اللي عمله كايسيدو ضد باريس كان ملحمة دفاعية فنية وبدنية كاملة الأركان.
والأجمل؟ إنه عمل كل ده في صمت.. مفيش شو، مفيش ضجيج، مفيش تصريحات، بس فيه أداء مرعب.
مويسيس كايسيدو = أفضل ارتكاز في العالم حاليًا.
• هجومي؟ بيعمل انطلاقات مرعبة
• دفاعي؟ محدش يعرف يعدّي
• تقنيًا؟ استلام، تمرير، افتكاك، كل حاجة صح
• بدنيًا؟ ماكينة بشرية لا تتعب ولا تمل
بصراحة؟
الراجل ده مش كفاية عليه 120 مليون.. برايتون لازم يطلب 100 مليون كمان !
تدخلات فيها شياكة، مجهود بدني لا يُقدر بثمن، صداع لأي خصم يفكر يمر من النص.
ماريسكا؟
رد على الكل امس، خط وسطه أكل باريس، وتحكّم في المباراة بإيقاع كايسيدو، اللي قدم واحدة من أعظم مبارياته على الإطلاق.
تشيلسي مش بس كسب لقب عالمي، كسب كمان بطل لاتيني حقيقي في قلب المعركة!
