نقدر نقول دلوقتى بكل طمأنينة إن مشكلة كيليان مبابى اللى لازمته فى بداية مشواره مع ريال مدريد اتحلت تماماً ، و خلينى أوضحلك أى مشكلة تحديداً عشان كان فيه مشكلتين ..
أول مشكلة و هى دى المقصودة بكلمة اتحلت تماماً و هى فرق الضغوط الفظيعة اللى يمكن زادت حتى عن ما كان مبابى نفسه متوقعه بين مناخ باريس سان چيرمان و مناخ ريال مدريد .. مبابى كان بيعانى نفسياً من ضغط رهيب فى البداية مع كل فرصة بتضيع و كل مباراة بتعدى من غير ما يسجل ..
تانى مشكلة هى الأهداف ، و كمية التوقعات الزيادة أوى بشكل زود الضغوط عليه أكتر و كإنه كائن فضائى جاى يسجل هدفين و تلاتة كل مباراة ، و ده مش طبيعى خصوصاً فى البدايات و فترة التأقلم الحتمية على أى لاعب ..
مبابى رغم تسجيله هدف فى أول مباراة رسمية مع الريال فى كأس السوبر الأوروبى ضد أتلانتا ، لكن غاب عنه التوفيق فى مباريات كتير و كان بيواجه صعوبات كتيرة فى التأقلم مع الفريق و أسلوب اللعب الهجومى لريال مدريد ..
مع الوقت بدأ مبابى يرجع لمستواه الطبيعى و يسجل الأهداف حتى لو لسه مش بالمعدل المتوقع لكن مشكلة التأقلم و التعامل مع الضغوط اتحلت تماماً ، و ده قاله مبابى بنفسه امبارح بعد تسجيل هدفين ضد لاس بالماس و تصدر الليجا ..
مبابى حالياً ثانى هدافين الليجا برصيد 12 هدف بفارق 4 أهداف عن ليڤاندوفسكى .. مبابى فى ديسمبر اللى فات لما كان فى أصعب لحظات بيمر بيها مع الفريق قال ” هذه لحظة صعبة و لكنه الوقت الأمثل لتغيير هذا الوضع و إظهار من أنا ”
من وقت التصريح ده مبابى كان له 10 مساهمات تهديفية فى 10 مباريات ، و لسه منتظر منه كتير جداً
